A vila de Sada acolle do 3 e 6 de agosto de 2023 a décimo sexta edición do Encontro de Embarcacións de Galicia; un evento que se consolida como a gran celebración da cultura marítima e fluvial de Galicia, a actividade máis senlleira da Federación, que se ven realizando dende 1993 de forma itinerante e que congrega, nas vilas mariñeiras onde alí se celebra, arredor dun cento de embarcacións tradicionais galegas e doutras partes da península e Europa.

Trátase dunha das concentracións de embarcacións tradicionais de maior dimensión e variedade tipolóxica da Península. Esta grande exhibición de embarcacións representativas do patrimonio marítimo e fluvial acompáñase durante as catro xornadas dun amplo programa de actos culturais e de lecer (conferencias, exposicións, presentación de publicacións, música, concertos, obradoiros, artesanía e outras mostras e actividades artísticas diversas) dirixidas a todo tipo de público asistente.

O Encontro achega o patrimonio marítimo ao gran público, implica á poboación e promove o asociacionismo cultural a prol do patrimonio, á vez que fomenta actividades de integración social, convivencia, divulgación, turismo sostible e outras.