Asociación Cultural Mariñeira Os Patexeiros
A Asociación Cultural Mariñeira Os Patexeiros nace en 2009 cando un grupo de persoas deciden facerse coa embarcación tradicional A Balbina co obxectivo de recuperar e poñer en valor esta emblemática embarcación, derradeiro barco patexeiro de Galicia.
A Asociación Cultural Mariñeira Os Patexeiros ten como finalidade, tanto a defensa, recuperación, conservación e difusión sustentábel da cultura marítima e fluvial e do patrimonio material e inmaterial de Galicia, como o fomento dos deportes náuticos sostíbeis e a defensa da natureza e do medio ambiente da franxa litoral.
Dende 2009 e ata o presente, a asociación vén organizando diferentes eventos con carácter sustentábel e de interese cultural e deportivo tales como: xornadas técnicas de navegación tradicional, regatas e xuntanzas de embarcacións tradicionais, cursos de carpintaría de ribeira e mantemento de embarcacións tradicionais, talleres de velaría, rutas de sendeirismo costeiro…
A ACM Os Patexeiros conta cunha frota formada por 12 embarcacións tradicionais de distintas tipoloxías (botes polbeiros, dornas, bucetas das Rías Altas, lancha patexeira, bote de media construción, etc) e actualmente colabora con diferentes asociacións relacionadas coa preservación sustentábel da cultura mariñeira de Galicia, así como co propio Concello de Sada.
Así, a ACM Os Patexeiros acreditan unha ampla experiencia na organización de actividades na liña das que conforman o Encontro de Embarcacións Tradicionais de Galicia, o que constitúe unha garantía e un saber facer que achega valor desde o punto de vista loxístico, organizativo e relacional no obxectivo de lograr un novo éxito na xeira de Encontros celebrados desde 1993.
Grazas a todos os participantes, ao equipo que conforma o Comité Organizador, ao patrocinio das distintas institucións públicas así como á colaboración de diversas entidades e colectivos locais, facemos posible un ano mais o maior evento a prol da salvagarda e da promoción da cultura e do patrimonio mariñeiro de Galicia.
Organizan
Patrocinan
Colaboran
Agradecementos en especial a todos patróns e patroas, tripulantes, equipo de voluntariado, mariñeir@s, artesáns, conferenciantes e resto de participantes no XVI Encontro de Embarcacións Tradicionais de Galicia
